Ushqimet e kripura, mishi i përpunuar dhe produktet e furrës janë ndër ushqimet që mund të ndikojnë negativisht në tensionin e gjakut, veçanërisht kur konsumohen rregullisht dhe në sasi të mëdha.
Tensioni i lartë i gjakut rrit rrezikun për sëmundje të zemrës, goditje në tru dhe probleme me veshkat, ndërsa dieta luan rol të rëndësishëm në menaxhimin e tij.
Dietologia Sheri Gaw, në një artikull për “EatingWell”, thekson se ushqimet e kripura, si patatinat, pretzelët dhe kokoshkat me gjalpë, mund të përmbajnë sasi të larta natriumi. Natriumi mund të bëjë që trupi të mbajë më shumë lëngje, duke rritur presionin mbi enët e gjakut.
Në këtë kategori përfshihet edhe mishi i përpunuar, si proshuta, salçiçet dhe hot-dogët, të cilët mund të kenë përmbajtje të lartë natriumi dhe yndyrash të ngopura. Sipas një studimi të cituar në artikull, konsumi i rregullt i mishit të përpunuar është shoqëruar me rrezik më të lartë për hipertension.
Ndërkohë, edhe buka dhe produktet e tjera të furrës mund të kontribuojnë në marrjen ditore të natriumit, sidomos për shkak se konsumohen shpesh. Hulumtime të kryera te rreth 15 mijë fëmijë dhe të rritur kanë identifikuar bukën dhe ëmbëlsirat ndër burimet e rëndësishme të natriumit në dietë.
Ekspertët theksojnë se nuk është një ushqim i vetëm që shkakton hipertension, por konsumi i shpeshtë i ushqimeve me shumë natrium mund ta bëjë më të vështirë kontrollin e tensionit të gjakut.