Deputeti i Aleancës për Ardhmërinë e Kosovës, Besnik Tahiri, tha se çështjet e rëndësishme po shtyhen vazhdimisht deri në ditët e fundit.
Tahiri ka thënë se kjo po ndodh edhe një javë para se Kuvendi të marrë vendim lidhur me mundësinë e shkuarjes së vendit në zgjedhje.
Sipas tij, institucionet po veprojnë vetëm kur përballen me presion ose krizë.
“Përsëri të gjitha temat serioze mbesin për 24 orët e fundit”, ka shkruar Tahiri.
Ai ka ngritur edhe çështjen e Ligjit për Gjykatën Speciale, duke pyetur pse Ministria e Drejtësisë nuk e ka kthyer atë në Kuvend për shqyrtim.
“Pse nuk kthehet Ligji në Kuvend nga Ministria e Drejtësisë? Ai Ligj nuk është ndonjë dokument analitik i NASA-s. Është ligj, me disa nene, që mund të diskutohet, ndryshohet dhe votohet”, ka deklaruar ai.
Ai ka kërkuar gjithashtu diskutim më serioz për zgjedhjen e Presidentit.
“Pse nuk ka diskurs serioz për zgjedhjen e Presidentit? Pse nuk flitet seriozisht për një shtet funksional dhe llogaridhënie? Sepse duket se qëllimi nuk është zgjidhja e krizave, por kalimi nga një krizë në tjetrën. Kjo nuk është qeverisje. Është shtyrje e vazhdueshme e problemit deri në minutën e fundit”.