Eric Wendt ka nisur zyrtarisht detyrën si Ambasador i Shteteve të Bashkuara të Amerikës në Shqipëri, duke shënuar një kapitull të ri në marrëdhëniet mes Tiranës dhe Uashingtonit.
Në rezidencën zyrtare të Ambasadës Amerikane në Tiranë, Trupa e Marinsave të Shteteve të Bashkuara ngriti flamurin amerikan në një ceremoni që shënoi fillimin e mandatit të ambasadorit të ri.
Me këtë rast, Ambasada Amerikane theksoi rëndësinë e marrëdhënieve dhe aleancës mes dy vendeve, duke nënvizuar se partneriteti bëhet më i fortë kur Shqipëria dhe SHBA-ja qëndrojnë së bashku, ndajnë përgjegjësitë dhe bashkëpunojnë për një të ardhme më të sigurt dhe më të begatë.
“Një kapitull i ri nis në Shqipëri! Trupa e Marinsave e Shteteve të Bashkuara ngriti flamurin amerikan në rezidencën zyrtare, teksa Ambasadori Wendt nis detyrën e tij. Nën udhëheqjen e Presidentit Trump, aleancat tona janë më të forta kur qëndrojmë së bashku, ndajmë përgjegjësitë dhe punojmë për një të ardhme më të begatë e më të sigurt për të dy vendet tona”, thuhet në reagimin e Ambasadës Amerikane.
Eric Wendt është ish-gjeneral-lejtnant i Ushtrisë Amerikane dhe u konfirmua nga Senati amerikan më 7 gusht 2026 si ambasador i SHBA-së në Shqipëri. Ai prezantoi letrat kredenciale te Presidenti shqiptar Bajram Begaj më 26 shtator.
Nisja e mandatit të Wendt vjen në kuadër të forcimit të bashkëpunimit mes Shqipërisë dhe Shteteve të Bashkuara, me marrëdhëniet dypalëshe që përfshijnë çështje të sigurisë, mbrojtjes dhe partneritetit strategjik.