Një grua 77-vjeçare ka ndërruar jetë disa ditë pasi kishte mbetur e lënduar rëndë në aksidentin e trafikut që ndodhi më 26 shtator në fshatin Biti të Shtërpcës.
Burimet e Sinjalit bëjnë me dije se bëhet fjalë për Hanife Sulejmanin, e cila ishte pasagjere në një Fiat Panda që u përfshi në një përplasje me një Audi Q5.
Aksidenti kishte ndodhur rreth orës 10:40, në magjistralen Shtërpcë–Ferizaj.
Sipas të dhënave fillestare, Fiat Panda po lëvizte në drejtim të Ferizajt dhe, para një kthese të thellë, dyshohet se shoferi ka humbur kontrollin mbi veturën, e cila është rrotulluar dhe ka kaluar në shiritin e kundërt, ku është përplasur me Audi Q5.
Si pasojë e aksidentit, disa persona kishin mbetur të lënduar.
Hanife Sulejmani, së bashku me të tjerë, ishte dërguar fillimisht për trajtim në Ferizaj e më pas në QKUK, ndërsa dy prej të lënduarve ishin transferuar edhe për trajtim në Shkup.
Më 29 shtator, 77-vjeçarja ka ndërruar jetë si pasojë e lëndimeve të marra në aksident.
Për zhvillimin e ri është njoftuar Prokurori i Shtetit, ndërsa rasti tashmë po trajtohet si aksident trafiku me fatalitet.
Hetimet për sqarimin e plotë të rrethanave të aksidentit po vazhdojnë.