Shkarkimi i Blerim Isufajt nga pozita e kryeprokurorit të Prokurorisë Speciale ka shkaktuar reagime të shumta në skenën politike.
Kryetari i Aleancës, Ardian Gjini, pas vendimit të Këshillit Prokurorial të Kosovës reagoi ashpër, duke e cilësuar shkarkimin e Isufajt si “hap të madh drejt totalitarizmit”.
Deklarata e Gjinit është komentuar edhe në emisionin “Forum” të DTV Media, ku analisti politik Jeton Zogjani u shpreh se kryetari i Aleancës duhet të fokusohet më shumë në punën politike dhe në rritjen e numrit të deputetëve.
“Ardian Gjini duhet me i rritë numrat e deputetëve në Kuvend, se statuse të tilla shkruaj edhe unë pas darke”, tha Zogjani në “Forum”.
Reagimi i Gjinit erdhi pasi KPK vendosi të largojë Isufajn nga pozita e kryeprokurorit. Sipas KPK-së, vendimi u bazua në vlerësimin e rrethanave institucionale dhe profesionale, duke përmendur keqmenaxhim, jokompetencë, mospërmbushje të detyrave dhe të standardeve të kërkuara të performancës. Isufaj do të vazhdojë të ushtrojë funksionin e prokurorit në Prokurorinë Speciale.
Ndërkohë, vendimi ka nxitur debat të gjerë politik, me Gjinin që e ka kundërshtuar publikisht shkarkimin, ndërsa në “Forum” është diskutuar edhe pesha politike e reagimeve ndaj këtij zhvillimi.