Kryeministri në detyrë, Albin Kurti, ka pritur dje në Zyrën e Kryeministrit përfaqësuesit diplomatikë të Shteteve të Bashkuara të Amerikës, Mbretërisë së Bashkuar dhe Gjermanisë.
Në takim morën pjesë e Ngarkuara me Punë e Ambasadës së SHBA-së, Anu Prattipati, ambasadori britanik Jonathan Hargreaves dhe ambasadori gjerman Rainer Rudolph.
Kurti bëri të ditur se nga të tre diplomatët ka pranuar urime për Qeverinë dhe mandatin e ri.
Gjatë takimeve është diskutuar për marrëdhëniet dypalëshe të Kosovës me këto tri shtete, si dhe mundësitë për avancimin e mëtejmë të tyre.
Sipas Kurtit, në fokus ishin edhe përparimi demokratik, zhvillimi i qëndrueshëm ekonomik dhe proceset integruese të Kosovës.
Një pjesë e diskutimeve iu kushtua edhe zhvillimeve aktuale dhe nevojës për stabilitet institucional, veçanërisht pas situatës së krijuar më 16 shtator.
Kurti ka shprehur mirënjohje për mbështetjen e vazhdueshme të Shteteve të Bashkuara, Mbretërisë së Bashkuar dhe Gjermanisë ndaj Kosovës.