Një aeroplan mjekësor me gjashtë persona në bord është zhdukur pranë ishullit Nantucket, teksa po udhëtonte nga Bermuda drejt Bostonit në orët e para të së shtunës.
Sipas Rojës Bregdetare të SHBA-së dhe Administratës Federale të Aviacionit (FAA), kontakti me aeroplanin e tipit Gulfstream G-100 është humbur gjatë fluturimit.
Pas humbjes së kontaktit, FAA ka lëshuar njoftim për kërkim dhe shpëtim, ndërsa ekipet kanë nisur operacionin në ujërat pranë Nantucket.
Në operacion janë përfshirë mjete ajrore dhe anije të Rojës Bregdetare amerikane.
Sipas të dhënave të publikuara nga autoritetet, aeroplani i përket kompanisë Latitude Air Ambulance. Ai ishte nisur rreth orës 23:40 të së premtes nga Bermuda dhe kontakti me të është humbur pas rreth një ore e 45 minutash fluturim.
Aeroplani pritej të mbërrinte në aeroportin ndërkombëtar Logan të Bostonit, ndërsa kërkimet për gjetjen e tij dhe personave në bord po vazhdojnë.