Ushtruesja e detyrës së presidentes të Kosovës, Albulena Haxhiu, ka kërkuar sqarim nga Gjykata Kushtetuese mbi menaxhimin e kompetencave presidenciale nëse Kuvendi dështon të zgjedhë kreun e ri të shtetit brenda afateve të paracaktuara.
Lajmi është konfirmuar për Radion Evropa e Lirë nga Zyra e Presidentes më 6 tetor, pikërisht në ditën kur skadon afati përfundimtar për zgjedhjen e presidentit të ri nga legjislatira aktuale.
Sipas njoftimit, kërkesa është dorëzuar në Gjykatën Kushtetuese më 5 tetor.
Sipas këtij institucioni, Haxhiu është mbështetur në nenin 113, paragrafi 3, nënparagrafi 1 i Kushtetutës së Kosovës, i cili rregullon të drejtën e autoriteteve të larta shtetërore për të ngritur çështje të konfliktit të kompetencave ose paqartësive kushtetuese.
“Kemi kërkuar të përcaktohet se si dhe nga kush ushtrohen kompetencat e domosdoshme presidenciale pas përfundimit të periudhës gjashtëmujore, kur presidenti i ri ende nuk është zgjedhur”, tha Zyra e Presidentes për REL-in.