Kryetari i PSD-së, Dardan Molliqaj, ka folur për personalitetin dhe mënyrën e funksionimit politik të kryeministrit të Kosovës, Albin Kurti.
Molliqaj ka thënë se ideologjia e Kurtit është autoritare dhe me tendencë totalitare.
Në emisionin “DPT Te Fidani”, ai ka deklaruar se kreu i Lëvizjes Vetëvendosje është i paparashikueshëm sa i përket aspektit taktik dhe strategjik.
Megjithatë, sipas Molliqajt, Kurti është i parashikueshëm vetëm në kuadër të ideologjisë së tij.
“Thelbi i pushtetit të Albin Kurtit është i rrezikshëm. E kur është i rrezikshëm, aty s’ka kritere për idenë e tij. As gjaku, as dëshmori, as e ardhmja, as kërkush. Dhe, kjo nuk ka të bëjë me Albin Kurtin, si djalë i dikujt ose si i rritur në Prishtinë, kjo ka të bëjë me idetë e Albin Kurtit, të cilat janë ku të duash. Tek ai është personifikuar personaliteti i Albin Kurtit.
Prandaj, kushdo që mendon që Albin Kurti mund të kuptohet nga gjestet, nga historia, e ka gabim. Albin Kurti kuptohet nga strategjia e taktika. E di ka njerëz që mendojnë që dinë strategji e taktikë, teorinë e lojës e luajnë mirë, e ka. As aty nuk e gjen.
Albin Kurti kuptohet dhe shpjegohet veç përmes ideologjisë, të cilën ai e ka përqafuar. Veç aty është i parashikueshëm… Ideologjia e tij është autoritare edhe me tendencë totalitare që nuk njeh demokracinë dhe që është subjekti i fundit i historisë në kuptimin që historia i ka dhënë një detyrë këtij me krye. Në kuadër të kësaj lejohet gjithçka”, tha ai.