Deputeti i Aleancës për Ardhmërinë e Kosovës (AAK), Ramush Haradinaj, ka marrë pjesë në aktivitetin e organizuar nga Ambasada e Gjermanisë në Kosovë me rastin e Ditës së Bashkimit të Gjermanisë.
Përmes një postimi në Facebook, Haradinaj ka bërë të ditur se gjatë aktivitetit ka zhvilluar një bisedë me ambasadorin e ri të Gjermanisë në Kosovë, Rainer Rudolph, me të cilin ka shkëmbyer mendime për zhvillimet aktuale në vend dhe thellimin e partneritetit ndërmjet Kosovës dhe Gjermanisë.
“36 vjet më parë, Gjermania e bashkuar tregoi lidership në liri dhe demokraci, duke kontribuar për paqe dhe stabilitet në botë”, ka shkruar Haradinaj.
Ai ka vlerësuar lart mbështetjen e Gjermanisë ndaj Kosovës, duke theksuar kontributin e saj në procesin e shtetndërtimit të vendit.
“Gjermania ka dhënë mbështetje shumë të madhe për shtetndërtimin e Republikës së Kosovës dhe për këtë, populli ynë do të jetë përgjithmonë mirënjohës”, ka deklaruar Haradinaj.