Gjykata Supreme e Kosovës ka reaguar publikisht pas thirrjeve të Kryetarit të Prishtinës, Përparim Rama, dhe paralajmërimit për protestë nga punëtorët e Ndërmarrjes Publike Banesore (NPB), lidhur me vonesat në marrjen e pagave si pasojë e bllokimit të llogarive bankare të ndërmarrjes.
Përmes një sqarimi për opinionin publik, Supremja ka bërë të ditur se lënda (E. Rev. nr. 49/2026) është pranuar më 21 gusht 2026 dhe aktualisht është në proces shqyrtimi. Gjykata kërkoi nga zyrtarët komunalë dhe palët e tjera që të shmangin çfarëdo forme presioni që cenon pavarësinë e gjyqësorit.
„Gjykata Supreme respekton të drejtën e qytetarëve dhe punëtorëve për të shprehur shqetësimet e tyre në mënyrë paqësore dhe në përputhje me ligjin. Njëkohësisht, rikujton rëndësinë e respektimit të pavarësisë së gjyqësorit dhe të shmangies së çdo forme të presionit që mund të perceptohet si ndërhyrje në procesin e vendimmarrjes gjyqësore”, thuhet në reagimin e Gjykatës Supreme.
Pavarësisht kërkesës së Ramës që rasti të trajtohet me prioritet për shkak të pamundësisë së ekzekutimit të pagave për punëtorët, Supremja sqaroi se nuk mund të paragjykojë afatin e përfundimit të lëndës.
„Gjykata Supreme e kupton rëndësinë e shqetësimeve të ngritura lidhur me gjendjen e punëtorëve të Ndërmarrjes Publike Banesore… Megjithatë, Gjykata thekson se shqyrtimi i çështjeve gjyqësore zhvillohet në përputhje me Kushtetutën dhe ligjet në fuqi. Përcaktimi i prioriteteve për shqyrtimin e lëndëve bëhet në pajtim me dispozitat ligjore përkatëse duke garantuar trajtim të paanshëm dhe të barabartë të palëve”, thuhet më tej në sqarim.