Analisti Jeton Zogjani ka kritikuar Bashkimin Evropian lidhur me qëndrimin ndaj dënimeve të krerëve të UÇK-së në Hagë, gjatë një paraqitjeje në emisionin “Forum” në DTV Media.
Zogjani ka përmendur dënimet që, sipas tij, arrijnë në gjithsej 81 vjet burgim për krerët e UÇK-së, duke shprehur pakënaqësi me atë që e konsideron mungesë të mbështetjes së BE-së për Kosovën përtej liberalizimit të vizave.
“UÇK-ja u dënua me 81 vjet, edhe po thonë: ‘Shuni, mos luani’”, ka deklaruar Zogjani, duke kritikuar qëndrimin e ambasadorëve dhe përfaqësuesve ndërkombëtarë ndaj kësaj çështjeje.
Ai ka ngritur gjithashtu një pyetje lidhur me mënyrën se si duhet të trajtohen librat shkollorë në Kosovë, duke përmendur ish-presidentin Hashim Thaçi si një nga figurat që zënë vend në tekstet shkollore dhe që mësohen nga fëmijët.
“Çka me bë me librat shkollorë sot? Krejt librat duhet me i hjek prej tregu?”, ka pyetur Zogjani, duke kundërshtuar atë që e sheh si mospërputhje mes trajtimit të krerëve të UÇK-së në Hagë dhe mënyrës se si historia e Kosovës u mësohet brezave të rinj.
Deklaratat e tij u bënë në kuadër të diskutimit për Gjykatën Speciale, dënimet ndaj ish-krerëve të UÇK-së dhe qëndrimin e Bashkimit Evropian ndaj Kosovës.