Gjykata Themelore në Prishtinë ka aprovuar kërkesën e Prokurorisë për caktimin e masës së paraburgimit prej një muaji ndaj Gani Gecit, i dyshuar për kanosje ndaj gazetarit Lirim Mehmetaj.
Vendimi është marrë pas një seance dëgjimore që ka zgjatur gati dy orë në Pallatin e Drejtësisë në Prishtinë.
Geci dyshohet se e ka kanosur gazetarin Lirim Mhmetaj të dielën, për shkak të një postimi të publikuar në rrjetin social Facebook lidhur me deputetin Fatos Geci, anëtar i familjes Geci nga Llausha.
Sipas Prokurorisë, Geci e ka kërcënuar Mehmetajn me qëllim që ta detyrojë ta largojë ose ta ndryshojë përmbajtjen e postimit.
Pasi Mehmetaj kishte refuzuar kërkesën e tij, bazuar në dosjen e Prokurorisë, Geci dyshohet se e ka kanosur drejtpërdrejt me fjalët: “Nëse nuk e hek postimin ose nuk e ndryshon, kena me u vra“.