Ish-diplomati Petrit Selimi, në emisionin “Forum” në DTV Media, ka komentuar protestat që po zhvillohen në Shqipëri, duke i lidhur ato me pakënaqësitë dhe tensionet që, sipas tij, po shfaqen në rajon dhe në Evropë.
Selimi ka thënë se pakënaqësia qytetare po vërehet në shumë vende, duke përmendur edhe protestat në Paris, Serbi dhe Mal të Zi. Sipas tij, kjo pakënaqësi po krijon nevojën që njerëzit të shprehin qëndrimet e tyre, por në disa raste protestat po kalojnë edhe në dhunë.
Duke folur për situatën në Shqipëri, ai është shprehur se zhvillimet atje i duken disi të çuditshme, veçanërisht duke pasur parasysh koordinimin e vendit me Bashkimin Evropian.
“Po e kam të vështirë ta definoj se kush janë protestuesit dhe cilat janë kërkesat e tyre”, ka thënë Selimi, duke komentuar situatën dhe dinamikën e protestave.
Ai ka theksuar se përshkallëzimi i dhunës nuk u sjell dobi as protestuesve, as shtetit dhe as policisë. Sipas tij, ekziston rreziku që tensionet e tilla të ndikojnë negativisht në procesin e integrimit evropian të Shqipërisë.
Në fund, Selimi ka shprehur shpresën që në Shqipëri të gjendet një rrugë për t’i dhënë fund protestave dhe për të shmangur përshkallëzimin e mëtejmë të situatës.