Dukagjin Gorani, në emisionin “Forum” në DTV Media, ka komentuar protestat që po zhvillohen në Shqipëri, duke u ndalur edhe te përdorimi i flamurit të UÇK-së nga protestuesit.
Gorani ka thënë se flamuri i UÇK-së po përdoret si simbol i rezistencës dhe se ai është i lidhur me historinë e mobilizimit dhe përballjes së shqiptarëve.
Sipas tij, ndonëse përdorimi i këtij flamuri në protestat në Shqipëri mund të mos jetë zgjedhja më e përshtatshme për momentin dhe rrethanat, qytetarëve nuk mund t’u ndalohet përdorimi i tij.
“Flamuri i UÇK-së atje po përdoret si simbol i rezistencës. Është flamur i cili është i kornizuar brenda historisë sonë si flamur i mobilizimit dhe përballjes”, ka deklaruar Gorani.
Ai ka theksuar se, pavarësisht rezervave për përshtatshmërinë e përdorimit të këtij simboli në protestat aktuale, nuk mund të mohohet domethënia historike që ai ka për shqiptarët.
Duke folur për shkaqet e protestave, Gorani është shprehur se pajtohet në masë të madhe me vlerësimin e Gjergj Buxhukut për situatën në Shqipëri.
Sipas tij, ajo që po ndodh nuk mund të shpjegohet përmes një faktori të vetëm, por është rezultat i ndërthurjes së shumë problemeve dhe rrethanave që janë akumuluar ndër vite.
Gorani ka vlerësuar se kjo situatë është shfaqje e një problemi më të thellë, të krijuar nga faktorë të shumtë, të cilët, kur bashkëveprojnë, prodhojnë një gjendje të tillë që vështirë të shpjegohet duke veçuar vetëm një shkak kryesor.
Deklaratat e tij vijnë në një kohë kur protestat në Shqipëri kanë nxitur debat të gjerë për gjendjen politike, ekonomike dhe shoqërore në vend, si dhe për simbolet që po përdoren nga protestuesit.