Instituti Kombëtar i Shëndetësisë Publike të Kosovës (IKShPK) ka njoftuar se nga 16 prilli deri më 18 tetor janë konfirmuar 224 raste me fruth në vend.
Sipas të dhënave të institutit, 21 raste të reja janë regjistruar vetëm gjatë javës së fundit, ndërsa mbi 95 për qind e personave të infektuar janë të pavaksinuar me vaksinën MMR.
IKShPK ka bërë të ditur se vaksinimi mbetet masa kryesore për parandalimin e sëmundjeve infektive dhe mbrojtjen e shëndetit të fëmijëve.
Në kuadër të vaksinimit plotësues për fëmijët që nuk janë vaksinuar me kohë, gjatë këtij viti janë vaksinuar mbi 3 mijë e 481 fëmijë të moshës 2 deri në 5 vjeç.
Instituti u ka bërë thirrje prindërve që të sigurohen se fëmijët e tyre janë vaksinuar sipas kalendarit të paraparë dhe, në rast të vaksinimit të vonuar, të konsultohen me profesionistët shëndetësorë.