Motra e 28-vjeçarit Erion Vishkulli, i cili u plagos rëndë në sy gjatë protestës së 24 tetorit në Tiranë, ka reaguar publikisht për të sqaruar rrethanat e dërgimit të tij për trajtim mjekësor në Itali. Përmes një postimi në rrjetet sociale, ajo ka mohuar pretendimet se shteti shqiptar ka mundësuar transferimin dhe trajtimin e specializuar të të riut.
Sipas motrës së Vishkullit, dërgimi i tij drejt Italisë është realizuar falë përpjekjeve dhe mbështetjes financiare të familjarëve, miqve dhe personave të tjerë që kanë ofruar ndihmë. Ky reagim vjen si kundërpërgjigje ndaj deklaratës së kryeministrit Edi Rama, i cili kishte pohuar se kishte dhënë udhëzime për mbulimin e shpenzimeve mjekësore të 28-vjeçarit.
Në mesazhin e saj, ajo u ka bërë thirrje mediave që të mos publikojnë informacione të pavërteta dhe të mos e përdorin rastin e vëllait të saj për propagandë politike. Ajo theksoi se shteti nuk ka qenë organizatori apo financuesi i këtij procesi, duke kërkuar që çështja të mos shndërrohet në një debat politik.
“Falënderojmë personat që morën iniciativën për një ndërhyrje më të specializuar në Itali. Mos ndani lajme pa bazë për shikime apo mashtrime e propaganda të Ramës, për të dalë protagonist i ngjarjes”, shkruan ajo në postimin e saj. Ajo shton se familja dëshiron të qëndrojë larg pjesës politike në këto momente të vështira.
Erion Vishkulli u plagos në syrin e majtë nga një plumb gome gjatë protestës së zhvilluar në Tiranë. Familjarët shpresojnë që trajtimi i specializuar në Itali të ndihmojë në shpëtimin e shikimit të tij. Në përmbyllje të reagimit, motra e të riut ka përcjellë një mesazh mbështetjeje për vëllain e saj, duke shprehur dëshirën për kthimin e tij në shtëpi në gjendje të mirë shëndetësore.