Deputetja e LDK-së, Janina Ymeri, ka kërkuar themelimin e një Komisioni Hetimor Parlamentar për tregtinë e energjisë elektrike, duke ngritur shqetësime për ndikimin e asaj që ajo e cilëson si “mafia energjetike” në institucionet e vendit.
Ymeri ka shprehur skepticizëm se kryeministri Albin Kurti do të ndërmarrë hapa për këtë çështje, ndërsa ka ngritur pikëpyetje për mënyrën se si Prokuroria Speciale dhe institucionet e tjera po trajtojnë rastet që lidhen me tregun e energjisë.
Ajo ka përmendur si shqetësim edhe shqyrtimin e kërkesave për rilicencimin e kompanive që, sipas saj, janë nën hetim.
“Dëshminë e kemi edhe dje kur hynë në rend dite për rilicencim kompani aktualisht nën hetim. Pritej të rilicencoheshin nga kush? Nga organi hetues”, ka shkruar Ymeri.
Deputetja ka theksuar se, sipas saj, tregtia e energjisë po rëndon buxhetin e qytetarëve dhe po ndikon negativisht në ekonomi. Ajo ka kërkuar që Kuvendi i Kosovës të marrë përgjegjësi përmes një hetimi parlamentar.
Ymeri u ka bërë thirrje deputetëve që ndajnë shqetësimet e saj të bashkohen për themelimin e komisionit, duke e cilësuar atë si një mekanizëm për të hetuar çështjet që lidhen me tregun e energjisë elektrike.
Ajo ka shtuar se kërkesa e saj, sipas deklarimit të vet, bazohet në vlerësime profesionale dhe jo politike.