Ish-kryetari i Aleancës për Ardhmërinë e Kosovës, Ramush Haradinaj, ka kërkuar përgjegjësi ligjore dhe institucionale pas vrasjes së Arlinda Sylaj Zekajt në Vitomiricë të Pejës.
Gjatë një deklarimi, Haradinaj e cilësoi rastin si të rëndë dhe tronditës, duke theksuar se përgjegjësi duhet të mbajnë jo vetëm kryesi i veprës, por edhe zyrtarët dhe institucionet që mund të kenë dështuar në përmbushjen e detyrave të tyre.
Ai kërkoi hetime profesionale dhe të paanshme për të përcaktuar se ku kanë dështuar mekanizmat e rendit dhe të ligjit, përfshirë Policinë dhe Prokurorinë.
Sipas Haradinajt, institucionet duhet të hetojnë funksionimin e tyre të brendshëm dhe rolin e secilit zyrtar në trajtimin e rastit.
Ai theksoi se dorëheqjet, të vetme, nuk e zgjidhin problemin, duke kërkuar edhe përgjegjësi politike e morale nga personat që kanë pasur rol në këtë çështje.
Haradinaj shtoi se ky rast duhet të shërbejë si thirrje për reflektim shoqëror dhe institucional, në mënyrë që raste të tilla të mos përsëriten dhe dështimet të mos mbeten pa pasoja.