Anita Mucaj-Haradinaj, bashkëshortja e ish-kryeministrit Ramush Haradinaj, ka reaguar pas vrasjes së Arlinda Zekajt, duke shprehur dhimbje për rastin dhe duke kërkuar që personi përgjegjës të marrë dënimin e merituar.
Në reagimin e saj, Mucaj-Haradinaj i është drejtuar avokates Adelina Hoxha, duke i kërkuar që të bëjë të ditur publikisht dhe para organeve hetimore se për cilin person me mbiemrin Haradinaj bëhet fjalë, lidhur me kërcënimet që, sipas saj, i kishte bërë personi i dyshuar për vrasjen e Arlinda Zekajt.
Ajo ka theksuar se nuk është hera e parë që persona të ndryshëm e keqpërdorin mbiemrin Haradinaj për të frikësuar dhe kërcënuar të tjerët, duke e përdorur atë si mburojë për veprimet e tyre.
Mucaj-Haradinaj ka shtuar se këtë mbiemër e mbajnë edhe ajo, fëmijët e saj dhe qindra anëtarë të tjerë të familjes, ndaj ka kërkuar që të mos krijohet paqartësi për personin të cilit i referohet avokatja.
“Ky është një mbiemër që përfaqëson sakrificën dhe dashurinë për atdhe, respektin ndaj shtetit dhe ligjit, e jo strehë horrash e kriminelësh”, ka shkruar ajo.
Në fund të reagimit, Mucaj-Haradinaj ka shprehur shpresën që personi përgjegjës për vrasjen e Arlinda Zekajt të marrë dënimin e merituar.