Analisti politik Dukagjin Gorani ka reaguar ndaj rastit të vrasjes së Arlinda Zekajt, gjatë diskutimit në emisionin “Forum” në DTV Media, duke kritikuar mungesën e ndjenjës së përgjegjësisë në shoqërinë kosovare.
Gorani tha se, ndonëse në Pejë u vra një grua, shumëkush vazhdon të sillet sikur kjo tragjedi nuk ka të bëjë me të, duke shmangur përgjegjësinë personale dhe institucionale.
“Është vra një grua në Kosovë, në Pejë, mirëpo kërkush prej neve nuk ndihet fajtor”, ishte mesazhi i tij gjatë diskutimit.
Ai vuri në pikëpyetje qëndrimin e qytetarëve që mendojnë se nuk kanë përgjegjësi për atë që ndodh përreth tyre, por edhe të institucioneve që kanë për detyrë të mbrojnë jetën dhe sigurinë e qytetarëve.
Sipas Goranit, përgjegjësia nuk mund të trajtohet vetëm si çështje individuale, por duhet të shihet edhe në raport me policinë, prokurorinë, udhëheqësit institucionalë dhe shoqërinë në tërësi.
Ai theksoi se një nga aspektet më shqetësuese të dhunës është se shoqëria mund të kontribuojë në krijimin e rrethanave ku ajo tolerohet, ndërsa më pas vazhdon jetën sikur të mos ketë ndodhur asgjë.