Policia e Kosovës ka arrestuar një 65-vjeçar, i dyshuar për përfshirje në rastin e rëndë që ndodhi më 1 nëntor në fshatin Demiraj të Gjilanit, ku u gjetën të vdekur një 27-vjeçar dhe një foshnjë.
Sinjali raporton se personi i arrestuar është Brahim Demiri, babai i 27-vjeçarit të ndjerë, Adonis Demiri, dhe gjyshi i foshnjës së gjinisë femërore.
Pas hetimeve fillestare, 65-vjeçari është arrestuar dhe, me vendim të prokurorit, është ndaluar për 48 orë.
Nëna e foshnjës nuk jetonte në të njëjtën shtëpi me 27-vjeçarin dhe vajzën e vogël.
Rasti ishte raportuar më 1 nëntor, rreth orës 08:47. Në vendin e ngjarjes kishin dalë njësitet policore, Prokurori i Shtetit dhe ekipi emergjent mjekësor, të cilët kishin konstatuar vdekjen e dy personave.
Rasti po hetohet si “Vrasje e rëndë”, ndërsa trupat e pajetë janë dërguar në Institutin e Mjekësisë Ligjore në Prishtinë për obduksion.