Ushtruesja e detyrës së Kryeprokurores së Prokurorisë Themelore në Pejë, Valbona Disha-Haxhosaj, ka mbajtur takime me prokurorët e shtetit dhe stafin administrativ të këtij institucioni, pas caktimit të saj në këtë pozitë nga Këshilli Prokurorial i Kosovës.
Në takimin me prokurorët, Disha-Haxhosaj ka kërkuar më shumë përkushtim dhe vigjilencë në ushtrimin e detyrave, veçanërisht gjatë kujdestarive, duke kërkuar që rastet të trajtohen me kohë dhe në mënyrë profesionale.
Në kuadër të ndryshimeve në organizimin e brendshëm, ajo ka caktuar prokurorin e shtetit, Ermal Demhasajn, koordinator të rasteve të dhunës në familje. Ky caktim është bërë për një periudhë të pacaktuar.
Disha-Haxhosaj ka zhvilluar takim edhe me stafin administrativ, nga i cili ka kërkuar angazhim më të madh, respektim të dispozitave ligjore dhe përmbushje profesionale të përgjegjësive, me qëllim të shmangies së lëshimeve dhe menaxhimit më efikas të proceseve administrative.
Sipas njoftimit të Prokurorisë Themelore në Pejë, ushtruesja e detyrës së Kryeprokurores ka shprehur gatishmërinë për të mbështetur prokurorët në ushtrimin e përgjegjësive të tyre.