Një muaj paraburgim i është caktuar Ismet Aksoyt, 52-vjeçarit nga Turqia, i cili dyshohet se shkaktoi incident brenda Stacionit Policor Jugu në Prishtinë, ku dëmtoi inventarin e një zyre dhe sulmoi një zyrtar policor me tastierë kompjuteri.
Vendimi është marrë nga Gjykata Themelore në Prishtinë, pas mbajtjes së seancës dëgjimore, ku është aprovuar kërkesa e Prokurorisë Themelore për caktimin e kësaj mase.
Aksoy dyshohet për dy vepra penale: “Sulm ndaj personit zyrtar gjatë kryerjes së detyrave zyrtare” dhe “Asgjësim apo dëmtim të pasurisë”.
Në arsyetimin e vendimit, gjykata ka vlerësuar se ekziston rreziku që i dyshuari, nëse lihet në liri, të pengojë zhvillimin normal të procedurës penale, t’i shmanget ndjekjes penale duke u arratisur, si dhe të përsërisë veprat për të cilat dyshohet.
“Gjykata vlerësoi se caktimi i masës së paraburgimit në këtë çështje penale është masë adekuate, pasi ekziston rreziku real që nëse i pandehuri lihet në liri, i njëjti mund të pengoj zhvillimin normal të procedurës penale, t’i shmanget ndjekjes penale duke u arratisur, pasi i njëjti është edhe shtetas i Turqisë. Gjykata ka vlerësuar se nëse i pandehuri lihet në liri ekziston rreziku që i njëjti të përsërisë veprat e njëjta penale”, thuhet në njoftimin e Gjykatës Themelore në Prishtinë.
Sinjali kishte raportuar ekskluzivisht për incidentin, i cili kishte ndodhur mëngjesin e 29 tetorit, rreth orës 08:10, brenda Stacionit Policor Jugu.
Sipas informacioneve të siguruara nga Sinjali, Aksoy, i cili në atë kohë ndodhej në ambientet e policisë si person i ndaluar, dyshohet se kishte nisur të dëmtonte raftet dhe dollapët në njërën prej zyrave të katit përdhes.
Më pas, ai dyshohet se kishte marrë tastierën e kompjuterit dhe e kishte hedhur në drejtim të zyrtarëve policorë, duke e goditur njërin prej tyre në këmbë.
Pas incidentit, policët kishin ndërhyrë për ta vënë nën kontroll dhe për t’i vendosur prangat, ndërsa në vendin e ngjarjes kishin dalë hetuesit dhe krimteknikët për të dokumentuar dëmtimet.
Zyrtari policor i goditur ishte intervistuar në cilësinë e të dëmtuarit, ndërsa dy zyrtarë të tjerë kishin dhënë deklarata si dëshmitarë.