Komisionerja e Bashkimit Evropian për Zgjerim, Marta Kos, ka paralajmëruar se amendamentet e propozuara për Ligjin për Dhomat e Specializuara të Kosovës mund të rrezikojnë përparimin e vendit në procesin e reformave evropiane.
Ajo bëri të ditur se Komisioni Evropian është tashmë në dialog me Qeverinë e Kosovës lidhur me këto amendamente, ndërsa shprehu shpresën që institucionet e reja të mundësojnë avancimin e vendit.
“Tash me qeverinë e re, shpresoj që shteti ta ketë mundësinë të ecë para. Amendamentet në Ligjin për Specialen rrezikojnë ta minojnë çdo përparim, por tashmë jemi në dialog sa i përket këtyre amendamenteve me Qeverinë e Kosovës”, ka thënë ajo.
Duke folur për rrugën e Kosovës drejt integrimit evropian, Kos ka theksuar se hapi i ardhshëm është arritja e pajtimit mes 27 shteteve anëtare të BE-së, në mënyrë që ato t’i kërkojnë Komisionit Evropian përgatitjen e opinionit për aplikimin e Kosovës për anëtarësim.
Ajo ka përsëritur se Bashkimi Evropian është i gatshëm të ndërmarrë këtë hap, por ka theksuar se për të siguruar mbështetjen e shteteve anëtare, Kosova duhet të ruajë stabilitetin institucional dhe të shënojë rezultate konkrete në reforma.
“Jemi të gatshëm ta bëjmë këtë. Por për t’i bindur shtetet anëtare, Kosovës i duhen institucione të qëndrueshme, siç i ka tash, dhe përparim në reforma dhe sa më i fortë përparimi në reforma edhe më i fuqishëm do të jetë rasti i Kosovë për të ecur përpara”, ka thënë ajo.