Një reagim i menjëhershëm i Policisë së Kosovës ka parandaluar rrezikun e përhapjes së zjarrit në zonën malore të fshatit Mirosalë në Komunën e Ferizajt.
Sipas njoftimit zyrtar, me të pranuar informatën për zjarr në zonën malore, policët e stacionit të Ferizajt kanë dalë në teren ku kanë identifikuar të dyshuarin M.K. (39 vjeç), i cili kishte shkaktuar zjarrin duke djegur mbeturina.
Në njoftim është bërë e ditur se ndaj tij është shqiptuar gjobë kundërvajtëse prej 500 eurosh.
“Policia Rajonale e Ferizajt apelon te qytetarët që të mos ndezin mbeturina, apo materiale të tjera në hapësira të hapura, veçanërisht pranë pyjeve, pasi zjarret mund të përhapen shpejt dhe të shkaktojnë dëme të mëdha në natyrë, prona dhe të rrezikojnë jetën e qytetarëve.”, thuhet në njoftim.