Ish-ambasadorja e Kosovës, Alma Lama, ka kritikuar gjendjen e institucioneve të Kosovës, duke vlerësuar se në shumë prej tyre nuk ka pasur progres, por një stagnim të theksuar, ndërsa në disa institucione është vërejtur edhe rënie e performancës.
Duke folur në emisionin “Forum” në DTV Media, Lama tha se kjo gjendje lidhet edhe me krizën e gjatë politike që kanë përjetuar institucionet e Kosovës, e cila, sipas saj, ka ndikuar drejtpërdrejt në funksionimin dhe punën e tyre.
Ajo u ndal veçanërisht te sistemi i drejtësisë, ku tha se ka shenja të prapakthimit. Sipas saj, është vërejtur zvogëlim i numrit të rasteve që lidhen me krimet e nivelit të lartë, ndërsa në të njëjtën kohë ka rritje të rasteve të krimeve të nivelit më të ulët.
Lama vlerësoi se këto zhvillime janë shqetësuese për funksionimin e institucioneve dhe për zbatimin e sundimit të ligjit në vend.
Vlerësimet e Lamës për stagnimin institucional vijnë në një kohë kur edhe Raporti i Komisionit Evropian për Kosovën 2026 ka evidentuar probleme serioze në funksionimin e institucioneve.
Raporti, i publikuar më 4 nëntor 2026, thekson se kriza e zgjatur institucionale dhe bllokada politike kanë ngadalësuar procesin e reformave evropiane në Kosovë.
Sipas Komisionit Evropian, Kosova nuk ka shënuar progres në dhjetë kapituj të integrimit evropian, ndërsa në fushën e funksionimit të gjyqësorit është konstatuar mungesë progresi.
Raporti evidenton gjithashtu rënie të aktakuzave dhe dënimeve në rastet e korrupsionit të nivelit të lartë, si dhe mungesë të rezultateve të mjaftueshme në luftimin e korrupsionit.
Këto gjetje e vendosin edhe një herë në qendër të debatit publik çështjen e përgjegjësisë institucionale, pavarësinë e drejtësisë dhe ndikimin e krizave politike në funksionimin e shtetit.