Deputeti i LDK-së, Anton Quni, është deklaruar sot në seancën plenare, lidhur me betimin ushtarak të djalit të tij Driton Quni, në Forcat e Armatosura të Republikës së Kroacisë.
Quni kishte njoftuar ditë më parë për këtë lajm në rrjetin e tij social Facebook, por sot ai tha që për shkak të këtij lajmi ai është linçuar në media dhe rrjete sociale.
“Për fat të keq ky gëzim prindëror u bë shënjestër e një fushate të ulët linçimi, dezinformimi dhe keqpërdorimi nga disa media dhe profile publike”, tha Quni.
Ai poashtu shtoi se Dritoni përveç se ka shtetësinë kosovare, gjithashtu gëzon edhe shtetësinë kroate, dhe se ai iu ka përgjigjur ftesës ligjore për shërbimin obligativ ushtarak ashtu si qindra të rinj shqiptarë në vende të tjera perëndimore.
“U tha se kam keqpërdorur autoritetin tim politik si deputet për ta dërguar djalin në një ushtri të huaj. Dritoni ka lindur, është shkolluar dhe jeton në Kosovë. Ai nuk është dërguar atje me ndonjë ndikim politik, privilegj apo proteksion, por për shkak të një fakti të thjeshtë: ai krahas shtetësisë së Kosovës, gëzon edhe atë të Kroacisë. Si çdo shtetas tjetër i atij vendi, ai iu përgjigj ftesës ligjore për shërbimin obligativ ushtarak, njësoj si qindra të rinj shqiptarë, që shërbejnë në ushtri të vendeve perëndimore e rajonale si në Zvicër, Austri e shtete tjera”, deklaroi Quni.