Presidentja e Kosovës, Justina Shiroka Pula, ka vlerësuar mbështetjen e vazhdueshme të Belgjikës për Kosovën, duke theksuar rëndësinë e forcimit të mëtejmë të bashkëpunimit ndërmjet dy vendeve.
Ajo i bëri këto deklarata në pritjen e organizuar nga Ambasada e Belgjikës në Kosovë, me rastin e Ditës së Mbretit.
Shiroka Pula tha se Kosova nuk e harron solidaritetin e Belgjikës gjatë luftës së viteve 1998–1999, si dhe mbështetjen e saj për ndërhyrjen e NATO-s.
Ajo theksoi se Belgjika ka qenë vazhdimisht përkrah Kosovës në procesin e shtetndërtimit dhe zhvillimit demokratik, që nga njohja e pavarësisë së vendit.
Presidentja vlerësoi gjithashtu se të dyja shtetet kanë potencial për ta thelluar bashkëpunimin në fusha të ndryshme, përfshirë ekonominë, arsimin, kulturën dhe bashkëpunimin institucional.