Shoqata Amerikane e Kancerit (ACS) ka publikuar udhëzime të reja për kontrollin dhe zbulimin e hershëm të kancerit të prostatës, duke ndryshuar rekomandimet që kishin qenë në fuqi për 16 vjet.
Sipas udhëzimeve të reja, burrat nga mosha 50 deri në 69 vjeç, të cilët kanë rrezik mesatar për këtë sëmundje, rekomandohet të bëjnë testin e gjakut PSA çdo dy vjet. Ky test mat nivelin e antigjenit specifik të prostatës, i cili mund të ndihmojë në identifikimin e shenjave të mundshme të kancerit.
Ndërkaq, për burrat me rrezik më të lartë, rekomandohet që kontrollet të fillojnë më herët dhe të kryhen çdo vit. Në këtë grup përfshihen burrat me ngjyrë të zezë, si dhe ata që kanë prind, vëlla, motër apo fëmijë të diagnostikuar me kancer të prostatës, veçanërisht para moshës 65-vjeçare.
Për burrat nga mosha 70 deri në 74 vjeç, vendimi për kontroll duhet të merret në konsultim me mjekun, pasi përfitimet dhe rreziqet mbeten të paqarta. Ndërsa për personat mbi 75 vjeç, kontrolli nuk rekomandohet në mënyrë rutinore, megjithëse burrat në gjendje të mirë shëndetësore mund ta diskutojnë vazhdimin e tij me mjekun.
Ndryshimi vjen pas vlerësimit të provave të reja shkencore, të cilat, sipas ACS-së, tregojnë se testimi PSA mund të shpëtojë jetë duke ndihmuar në zbulimin e kancerit në faza më të hershme.
Megjithatë, kontrolli për kancerin e prostatës ka qenë temë diskutimi mes profesionistëve shëndetësorë, pasi shumë raste zhvillohen ngadalë dhe mund të mos bëhen kurrë të rrezikshme. Kjo ka ngritur shqetësime për ankthin e panevojshëm dhe trajtimet që mund të shkaktojnë pasoja afatgjata.
Në rastet kur niveli i PSA-së rezulton i lartë, rekomandohet që testi të përsëritet pas një periudhe prej dy javësh deri në tre muaj. Nëse rezultati mbetet i lartë, mund të pasojnë rezonanca magnetike dhe analiza të tjera për të vlerësuar nëse nevojitet biopsia.
Për pacientët e diagnostikuar me forma të kancerit me rrezik të ulët, ACS rekomandon që si mundësi fillestare të ofrohet mbikëqyrja aktive, përmes kontrolleve të rregullta, pa filluar menjëherë trajtimin.
Kanceri i prostatës mbetet një nga shkaktarët kryesorë të vdekjeve nga kanceri te burrat në SHBA, ku këtë vit pritet të regjistrohen mbi 36 mijë vdekje nga kjo sëmundje.