Aleanca për Ardhmërinë e Kosovës ka reaguar pas vendimit të Gjykatës Kushtetuese, e cila konstatoi se afati për konstituimin e Kuvendit është konsumuar.
AAK ka thënë se këtë qëndrim e ka përsëritur vazhdimisht, duke pretenduar se partia fituese e zgjedhjeve të kaluara e ka zvarritur procesin që nga 7 qershori.
Sipas AAK-së, këto vonesa janë bërë me qëllim që vendi të shkojë sërish në zgjedhje.
“Gjykata Kushtetuese e nxori Kosovën prej një momenti të paparashikuar krize, 6 tetorin”, thuhet në reagimin e Aleancës.
AAK ka pretenduar se përgjegjësia për situatën bie mbi kryeministrin në detyrë, Albin Kurti.
“Shkeljet kushtetuese kurrë nuk kanë arsye patriotike”, ka deklaruar AAK, duke shtuar se çdo shkelje e Kushtetutës, sipas saj, bëhet me qëllim të mbajtjes së pushtetit në mënyrë të paligjshme.
Në reagim, Aleanca ka thënë se qytetarët e Kosovës janë në dijeni për zhvillimet politike dhe interesat partiake të akterëve politikë.