Prokuroria Themelore në Prishtinë, në bashkëpunim të ngushtë me Njësinë e Antidrogës së Policisë së Kosovës, ka zhvilluar një operacion të suksesshëm antidrogë në lagjen Veternik të kryeqytetit, gjatë të cilit janë sekuestruar mbi 2 kilogramë substancë narkotike.
Sipas njoftimit zyrtar, operacioni është rezultat i një pune hetimore disa javore dhe është kryer në kuadër të përpjekjeve të vazhdueshme për luftimin e krimit të organizuar dhe shpërndarjes së drogës në vend.
“Prokuroria Themelore është në zhvillim e sipër të këtij aksioni dhe në bashkëpunim me organet e rendit po vazhdon hetimet për zbardhjen e plotë të rrethanave të rastit,” thuhet në komunikatën për media.
Deri më tani, nuk është bërë e ditur nëse ka persona të arrestuar lidhur me këtë rast, por autoritetet kanë konfirmuar se aksioni është ende në vijim dhe priten zhvillime të tjera në orët dhe ditët në vijim.