Kandidati për deputet nga Lëvizja Vetëvendosje dhe ish-ministri i Shëndetësisë, Arben Vitia, ka bërë të ditur se investimet në Spitalin e Gjakovës po vazhdojnë me intensitet, me synim rritjen e cilësisë së shërbimeve dhe përmirësimin e kushteve për pacientët.
Gjatë kësaj jave, në këtë institucion shëndetësor janë vendosur shtretër modernë për hemodializë, ndërsa hyrja kryesore e spitalit është rregulluar me një recepsion funksional dhe të standardizuar, duke lehtësuar qasjen dhe orientimin e pacientëve dhe familjarëve të tyre.
Sipas Vitisë, këto përmirësime janë vazhdimësi e investimeve të mëparshme, që përfshijnë vendosjen e shërbimeve dhe aparaturave të reja, transformimin e Repartit të Psikiatrisë, si dhe procesin e transformimit të Kuzhinës Qendrore.
“Vazhdojmë me investime që garantojnë trajtim të sigurt, cilësor dhe dinjitoz për pacientët tanë,” ka theksuar Vitia, duke nënvizuar përkushtimin për një sistem shëndetësor më funksional dhe më njerëzor.
Këto investime, sipas tij, janë dëshmi e fokusit të Qeverisë dhe Ministrisë së Shëndetësisë në përmirësimin e infrastrukturës dhe shërbimeve shëndetësore në të gjitha rajonet e Kosovës.