Kandidati për kryetar të Komunës së Gjilanit nga Lidhja Demokratike e Kosovës (LDK), Arbër Ismajli, ka vizituar Ansamblin e Këngëve dhe Valleve “Gjilani” bashkë me kandidatin për Asamblenë Komunale, Fahredin Hajdarin, duke e cilësuar këtë ansambël si “njërën prej pasurive më të çmuara kulturore të qytetit”.
“Ansambli i Këngëve dhe Valleve ‘Gjilani’ është njëra nga skuadrat kulturore që na bëjnë krenar si Gjilan dhe si Republikë. Ishte moment krenarie me pa nga afër punën, përkushtimin dhe dashninë që këta artistë e japin çdo ditë për ta mbajtur gjallë kulturën dhe traditën tonë,” deklaroi Ismajli.
Ai theksoi se ky ansambël ka përfaqësuar me dinjitet Gjilanin dhe Kosovën në shumë skena, duke u bërë ambasador i vlerave kombëtare përmes këngës e valles.
“Me shumë pasion, sakrificë dhe pa kushte të mëdha, ata e mbajnë gjallë shpirtin e këtij qyteti të bekuar,” shtoi ai.
Ismajli u zotua se në qeverisjen e tij, kultura dhe arti do të kenë vendin që e meritojnë, duke premtuar rikthimin e Ansamblit të Qytetit të Gjilanit si institucion me mbështetje të qëndrueshme.
“Do t’u japim mbështetje të plotë, sepse qyteti që e mbron kulturën e vet, e mbron edhe shpirtin dhe pasqyrën e vet përfaqësuese,” theksoi kandidati i LDK-së.
Në fund, ai falënderoi për pritjen e ngrohtë dhe emocionin që ndau me artistët:
“Gjilani ka me u kthy në qendër të kulturës e traditës, aty ku i ka hije me qenë!”