Analisti Milaim Zeka tha se SPAK ka bërë punë shumë të mira, por duket se gjatë periudhës së fundit ka dalë nga shinat Kushtetuese.
Zeka tha se 3 janë momentet që ka mbetur i zhgënjyer nga SPAK.
“Momenti i parë është mënyra se si u arrestua Ilir Meta. E dyta është Sali Berisha, i cili e quan SPAK organizatë kriminale, pra është një akuzë penale, dhe momenti i 3-të është arrestimi i Erion Veliaj. Pajtohem me deklaratën e Kryeministrit që tha se këtu bëhet luftë për të arrestuar sa më shumë.
Nëse SPAK e ka me ngut arrestimin e Erion Veliajt, atëherë lind pyetja: më e rëndë është vjedhja e një tenderi, apo vrasja e 4 personave në bulevard? Kam frikë se po dështon misioni i SPAK”, tha Zeka.
Duke folur për arrestimin e Erion Veliajt, Zeka tha se ka informacione se Prokurori i ka shkuar dhe i ka kërkuar një leje ndërtimi, ndërsa Kryebashkiaku ia ka dhënë duke u bazuar në ligj.
“Ky prokuror ka konflikt interesi. Nëse kanë pasur përplasje të hershme dhe nëse ky prokuror e ka pasur personale është shumë lajm i zi për këtë vend”, tha Zeka.
Ai tha se SPAK do të jetë në një monitorim të jashtëzakonshëm jo vetëm nga mediat, por edhe nga qarqet ndërkombëtare.
“Nëse këta njerëz nuk kanë fakte dhe nëse dështojnë, është një lajm i keq për SPAK dhe Erion Veliaj mund t’a padisë në Strasburg dhe do jetë një njollë e zezë për Shqipërinë”, tha Zeka.