Prokuroria Themelore në Prishtinë njoftoi se ka arrestuar një person të dyshuar për shpërthimin ndaj veturës së Osman Hajdarit, ushtruesit të detyrës së drejtorit të Qendrës Klinike Universitare të Kosovës (QKUK).
Ngjarja ka ndodhur më 30 prill, kur vetura e Hajdarit u dëmtua gjatë kohës që ishte e parkuar në oborrin e QKUK-së.
I dyshuari, i identifikuar me inicialet B.K., u arrestua në Podujevë dhe akuzohet për tre vepra penale: përdorimin e armës apo mjetit të rrezikshëm, zjarrvënie dhe mbajtje të paautorizuar të armëve. Prokuroria dhe policia janë duke vazhduar hetimet për zbardhjen e plotë të ngjarjes dhe motivet pas shpërthimit.
Sipas Policisë, incidenti shkaktoi vetëm dëme materiale.