Me afrimin e sezonës veror, kur koncertet, dasmat dhe aktivitetet argëtuese marrin hov në mbarë vendin, Administrata Tatimore e Kosovës (ATK) ka dalë me një njoftim drejtuar artistëve dhe organizatorëve të eventeve muzikore dhe artistike.
Përmes një postimi në faqen zyrtare në Facebook, ATK u ka bërë thirrje të gjithë këngëtarëve, artistëve dhe subjekteve të përfshira në ofrimin e shërbimeve argëtuese që të përmbushin detyrimet e tyre tatimore, në përputhje me legjislacionin në fuqi.
“Kjo periudhë e intensifikuar e angazhimeve artistike nuk përjashton askënd nga përgjegjësitë ligjore,” thuhet në njoftim. “Pagesa e tatimeve është obligim ligjor”.
Administrata apelon për deklarim dhe pagesë të rregullt të të ardhurave, me qëllim të shmangies së ndëshkimeve të mundshme ligjore. Kjo thirrje vjen në një kohë kur aktivitetet muzikore dhe artistike shtohen ndjeshëm nëpër të gjitha trevat shqiptare, me një numër të madh të performancave live, koncerteve, mbrëmjeve muzikore e dasmave.
ATK rikujton se, përveç detyrimit moral, pagesa e tatimeve është edhe një akt ligjor dhe përgjegjësi qytetare, ndaj secili që gjeneron të ardhura nga këto aktivitete duhet të jetë në përputhje me obligimet fiskale.