Blerta Kllokoqi-Rugova, bashkëshortja e deputetit të Lidhjes Demokratike të Kosovës, Ukë Rugova, e ka hedhur poshtë me “karton të kuq” mbajtjen e zgjedhjeve të reja, pavarësisht se rivali politik i bashkëshortit të saj para pak ditësh e formoi qeverinë e re.
Kllokoqi-Rugova është shfaqur të premten duke mbajtur një karton të kuq para objektit të Qeverisë së Kosovës në Prishtinë, tregon një video të cilën ajo e publikoi në rrjetin social Facebook.
“Karton i kuq zgjedhjeve të reja”, ka shkruar ajo në përshkrimin e protestës së saj. “Boll Ma”.
Bashkëshortja e djalit të ish-presidentit Ibrahim Rugova, ka disa ditë që ka nisur një fushatë proteste që synon rritjen e vetëdijësimit shoqëror mbi kauza të ndryshme. Aksionet simbolizohen nga një “karton i kuq”.
Por, protesta e saj kundër shkuarjes së vendit në zgjedhje të reja bie në kontradiktë të thellë me synimet e bashkëshortit Ukë Rugova dhe Lidhjes Demokratike të Kosovës, partisë të cilës ai i takon.