Bebe Rexha ka hapur zyrtarisht një kapitull të ri në karrierën e saj muzikore me publikimin e këngës së re “Dirty Blonde”, projekti i parë nga albumi i saj i ardhshëm vizual I Like You Better Than Me. Kënga është tashmë e disponueshme në të gjitha platformat muzikore dhe shënon nisjen e një projekti ambicioz që pritet të tërheqë vëmendjen e publikut.
Albumi do të përbëhet nga 13 këngë që do të publikohen gradualisht, secila e shoqëruar me videoklip, duke krijuar një eksperiencë të plotë audiovizuale për fansat. Ky format vizual synon të tregojë një anë të re artistike të këngëtares dhe të ndërtojë një rrëfim të vazhdueshëm përmes muzikës dhe imazhit.
Në të njëjtën ditë me publikimin e këngës, Rexha ndau edhe një video përmbledhëse me fragmente nga projektet e albumit. Vëmendje të veçantë mori një pjesë nga kënga “Çike çike”, ku artistja surprizoi publikun duke kënduar në shqip. Ky moment u prit me entuziazëm të madh nga fansat shqiptarë, të cilët e panë si një lidhje të drejtpërdrejtë të artistes me rrënjët e saj.
Reagimet e para për projektin kanë qenë pozitive, ndërsa pritshmëritë për albumin e plotë janë të larta. Bazuar në interesin e krijuar që në nisje, I Like You Better Than Me pritet të jetë një tjetër sukses në diskografinë e Bebe Rexhës.