Kandidati i PDK-së për Kryeministër, Bedri Hamza, ka mbajtur sonte një takim me gra nga rajoni i Ferizajt.
Hamza ka thënë se dhuna ndaj grave është një plagë që nuk duhet ta lejojmë të vazhdojë. Ai ka thënë se nuk duhet të merremi vetëm me pasojat, por me parandalimin që ajo asnjëherë të mos ndodhë.
“Për të thyer stereotipet, ne jo vetëm që do të ndërmarrim fushata ndërgjegjësuese, por do të rrisim edhe pjesëmarrjen e grave në profesione që dikur janë konsideruar të papërshtatshme për to. Ushtria dhe policia janë shembuj të këtyre fushave. Do të krijojmë programe trajnimi dhe aftësimi profesional që të përgatisim vajzat dhe gratë për një treg pune që i mirëpret ato si të barabarta dhe konkurruese. Dhuna ndaj grave është një plagë që nuk duhet ta lejojmë të vazhdojë”.
“Nuk duhet të merremi vetëm me pasojat, por me parandalimin, që ajo asnjëherë të mos ndodhë. Çdo formë dhune, qoftë fizike, psikologjike apo emocionale, nuk është thjesht një sulm ndaj dinjitetit të tyre. Është një dështim për shoqërinë tonë. Nuk do të lejojmë më që gratë të jetojnë me frikë. Do të ndërtojmë qendra që do të përkujdesen edhe për raste të tilla. Përkushtimi dhe zotimi im është i qartë: zero tolerancë për dhunën ndaj grave dhe dhunën në familje”, ka thënë Hamza.
