Kandidati i AAK-së për kryetar të Prishtinës, Bekë Berisha, ka reaguar ashpër pas raportimeve për të shtëna me armë në lagjen “Mati 1”, ngjarje kjo që, sipas tij, është e dyta brenda një jave. Më shqetësuese, siç thekson ai, është fakti se incidenti i fundit ka ndodhur brenda hapësirave të shkollës “Pavarësia”, duke rritur ndjeshëm shqetësimin për sigurinë e fëmijëve dhe banorëve të zonës.
“Ky është një shqetësim i madh për sigurinë e qytetarëve dhe sidomos për fëmijët tanë. Lagjja Mati 1, për nga dendësia e popullsisë, mund të krahasohet me një komunë më vete, prandaj kërkoj nga Policia e Kosovës që të ketë prezencë të shtuar policore në këtë zonë,” ka deklaruar Berisha përmes një postimi në rrjetet sociale.
Ai ka paralajmëruar se AAK do të shqyrtojë seriozisht mundësinë për hapjen e një nënstacioni policor në Mati 1, si një masë konkrete për përmirësimin e sigurisë publike.
“Kur këto ngjarje përshkallëzohen, kërkohen masa të shpejta dhe konkrete sigurie. Nuk mund të presim përfundimin e fushatës zgjedhore apo krijimin e qeverisë së re. Siguria e qytetarëve nuk pret dhe na cenon të gjithëve,” përfundon reagimin e tij Berisha.