Kandidati i LDK-së për kryetar të Komunës së Rahovecit, Burim Krasniqi, ka prezantuar projektin më të ri që lidhet drejtpërdrejt me jetën dhe sigurinë e qytetarëve – aplikacionin “SOS Butoni”, i cili do të jetë i qasshëm për iOS dhe Android.
Krasniqi tha se ky projekt inovativ do të jetësohet brenda vitit të parë të mandatit të tij, ndërsa theksoi se faza e parë e tij tashmë ka përfunduar falë ekipit të të rinjve të LDK-së në Rahovec.
“Unë nuk jap zotime të kota, por filloj t’i realizoj që tani. SOS Butoni është koncept i qartë, i dobishëm dhe jetik, veçanërisht për të moshuarit dhe personat me sëmundje kronike në komunën tonë,” deklaroi Krasniqi.
Sipas tij, aplikacioni do të funksionojë me vetëm një prekje, duke thirrur ndihmën dhe duke dërguar menjëherë vendndodhjen tek shërbimet shëndetësore dhe familjarët e përcaktuar.
🔘 Çfarë ofron SOS Butoni:
-
Buton SOS i thjeshtë dhe i madh për përdorim të menjëhershëm.
-
Vendndodhje GPS që dërgohet automatikisht tek shërbimet përkatëse.
-
Lidhje direkte me shërbimet shëndetësore dhe familjarët.
-
Siguri dhe qetësi për qytetarët e Rahovecit, si rezidentë ashtu edhe për ata në Prishtinë ose në mërgatë.
“SOS Butoni është një hap inovativ për ta bërë Rahovecin më të sigurt, më human dhe më afër nevojave të njerëzve tanë. Një prekje – një jetë e shpëtuar,” tha Krasniqi.
#BurimKrasniqi
#RahoveciPërtej
#LDK113