Një muaj paraburgim është caktuar si masë sigurie për pesë policët e dyshuar në rastin e vdekjes së 27 vjeçarit në Lipjan.
Lajmin për KosovaPress e ka konfirmuar zëdhënsja e Gjykatës Themelore në Prishtinë, Mirlinda Gashi.
Kujtojmë se sot është mbajtur seanca dëgjimore për pesë të dyshuarit, ku pas seancës avokati i një nga të dyshuarit, Besnik Berisha tha se zyrtarët policorë ishin vetëm duke kryer detyrën e tyre.
Për rastin ka reaguar edhe presidentja e vendit, Vjosa Osmani e cila ka bërë thirrje për transparencë të plotë dhe përgjegjësi institucionale.
Ndërkaq, në reagimin e ministrit në detyrë të Brendshëm, Xhelal Sveçla, është thënë se hetimet po zhvillohen me intensitet maksimal.
Avokati i Popullit ka hapur procedurë hetimore sipas detyrës zyrtare për të vlerësuar nëse ka pasur shkelje të të drejtave të njeriut në këto raste, si dhe për të monitoruar veprimet e institucioneve përgjegjëse, përfshirë Policinë e Kosovës dhe Inspektoratin Policor të Kosovës.