Ish-kryetarja e Komisionit Qendror të Zgjedhjeve, Valdete Daka, ka komentuar në emisionin “Forum” të DTV Media situatën rreth postit të Presidentit të Kosovës dhe pozitën e Albulena Haxhiut si ushtruese e detyrës së presidentes.
Daka ka deklaruar se, sipas saj, Haxhiu mund t’i drejtohet Gjykatës Kushtetuese për interpretim të mandatit të saj, në momentin kur t’i afrohet përfundimi i qëndrimit në këtë pozitë.
“Albulena, kur të dalë nga ajo zyrë, do të dërgojë një kërkesë për interpretim, me dëshirën që ta çojë sërish vendin në zgjedhje”, ka thënë Daka.
Sipas saj, situata mund të komplikohet edhe më tej nëse nuk zgjidhet Presidenti brenda afatit të përcaktuar.
Daka e ka lidhur këtë me deklaratat e fundit të Haxhiut, e cila tha se po e shqyrton mundësinë që t’i drejtohet Gjykatës Kushtetuese lidhur me mandatin e saj si ushtruese e detyrës së presidentes, nëse vendi nuk arrin ta zgjedhë presidentin e ri.
Haxhiu ka deklaruar se Kushtetuta përcakton se ushtruesja e detyrës së presidentes nuk mund të qëndrojë më shumë se gjashtë muaj, ndërsa ka thënë se për këtë çështje ekzistojnë interpretime të ndryshme. Ajo ka theksuar gjithashtu se shpreson që të arrihet konsensus politik për zgjedhjen e presidentit dhe të mos krijohet nevoja për një interpretim të ri nga Kushtetuesja.
Në “Forum”, Daka ka shprehur shqetësimin e saj se një situatë e tillë mund të sjellë zvarritje të mëtejshme institucionale dhe politike, duke e bërë edhe më të ndërlikuar situatën në vend.