Një incident ka ndodhur në një qendër të votimit në Podujevë, ku për pasojë një person ka përfunduar në prangat e Policisë.
Sipas informacioneve të para, rasti ka ndodhur në SHFMU “Xheladin Rekaliu” në Podujevë, ku një person dyshohet se e ka fotografuar qytetarin tjetër duke votuar, ndërsa më pas njëri prej tyre i ka sulmuar zyrtarët policorë.
Detaje në lidhje më këtë ka dhënë drejtoresha e shkollës “Xheladin Rekaliu”, Arjeta Bashota.
Ajo ka bërë të ditur se rasti ka ndodhur rreth orës 7:40, ku një qytetar e ka fotografuar qytetarin tjetër duke votuar.
“Rreth orës 07:43 minuta është parë një qytetar duke e fotografuar qytetarin tjetër duke votuar, pastaj është ndaluar nga Policia, mnë ndërkohë është bashkuar edhe qytetari i dytë. Policia ka kërkuar që t’i shohë fotografitë dhe të fshihen, ku personi i dytë ka qenë agresivë ndaj policëve duke i shtyrë, ku ka filluar konfrontimi. Pastaj policët janë detyruar të përdorin sprej dhe ta arrestojnë qytetarin”, ka potencuar Bashota.
Mes tjerash, ajo ka bërë të ditur se dy policët kanë pësuar lëndime.
Sinjali ka kontaktuar Policinë e Kosovës dhe është në pritje të përgjigjes zyrtare.