Kina ka nisur një mision hapësinor ambicioz me anijen kozmike Tianwen-2, e cila do të mbledhë mostra nga asteroidi 2016HO3 dhe do të eksplorojë kometën 311P në rripin kryesor të asteroidëve, një zonë që ndodhet edhe më larg Tokës sesa Marsi.
Misioni u nis të enjten nga Kina jugore me raketën Long March 3-B, sipas Administratës Kombëtare Hapësinore të Kinës (CNSA). Kreu i CNSA-së, Shan Zhongde, e përshkroi këtë projekt si një “hap të rëndësishëm në udhëtimin e Kinës në eksplorimin ndërplanetar”, duke theksuar se gjatë dhjetë viteve të ardhshme misioni do të sjellë zbulime të reja dhe do të zgjerojë njohuritë e njerëzimit për kozmosin.
Mostrat që pritet të mblidhen nga asteroidi 2016HO3 janë jashtëzakonisht të rëndësishme për shkencëtarët, pasi mund të ofrojnë të dhëna të vlefshme mbi origjinën e Tokës dhe formimin e saj, duke përfshirë edhe origjinën e ujit. Misioni parashikon kthimin e mostrave në Tokë pas rreth dy vitesh.
Ky projekt vjen pas disa arritjeve të mëparshme të Kinës në eksplorimin hapësinor, përfshirë kthimin e mostrave shkëmbinjsh nga ana e largët e Hënës dhe vendosjen në orbitë të stacionit hapësinor Tiangong, që vepron si “Pallati Qiellor” për astronautët kinezë.
Kina ka bërë hapa të mëdhenj në fushën hapësinore gjatë dy dekadave të fundit, duke u bërë vendi i tretë në botë që dërgon njerëz në hapësirë me kapacitet të vetin. Programi hapësinor kontrollohet nga Ushtria Çlirimtare Popullore, degë ushtarake e Partisë Komuniste kineze, dhe është fokusuar në zhvillimin e teknologjive dhe misioneve të avancuara si dërgimi i eksploruesve pa pilot në Mars dhe roverëve në anën e largët të Hënës. Kina gjithashtu synon të dërgojë astronautë në Hënë para vitit 2030 dhe po përgatitet për misionin Tianwen-4, i cili do të eksplorojë planetin Jupiter.
Misioni Tianwen-2 është një pjesë kyçe e planit kombëtar për zhvillimin e programit hapësinor dhe rritjen e pozicionit të Kinës si një nga fuqitë kryesore në eksplorimin e hapësirës, duke kontribuar në mënyrë të rëndësishme në njohuritë globale rreth universit dhe burimeve të tij.