Shkruan: Gani Nuha
Edhe Ditëlindjen e 18-të si shtet, Kosova po e shënon pa prezencën fizike të themeluesve të saj, të cilët po e bëjnë betejën finale në Hagë!
Zemrat dhe mendjet e gjithë liridashësve dhe liribërësve në këtë përvjetor janë me bashkëluftëtarët tanë, drejtuesit e UÇK-së, sepse liria dhe pavarësia e Kosovës ka emrin e tyre.
Ka emrin dhe sakrificën e mijëra heronjve dhe dëshmorëve, të cilët vunë gjakun e tyre në themelet e këtij shteti.
Më 17 shkurt, Kosova edhe do të festojë, edhe do të protestojë. Do të festojë Ditën e Madhe të Pavarësisë, e cila u arrit edhe me mbështetjen e fuqishme të SHBA-së dhe vendeve perëndimore, të cilat u rreshtuan në anën e Kosovës, në anën e Lirisë dhe Drejtësisë. Liria dhe Drejtësia janë vlera që duhet të mbrohen çdo ditë.
Zëri i Kosovës në mbrojtje të Drejtësisë do të jehojë fuqishëm edhe në Ditën e Pavarësisë dhe do të përcjellë mesazhin e fuqishëm se heronjtë tanë në Hagë nuk janë vetëm në pafajësinë e tyre.
Ne jemi të bindur se ata do të kthehen shpejt dhe fitimtarë. Çdo vendim tjetër do të ishte padrejtësi e madhe. Drejtësia ndërkombëtare dhe Evropa e vlerave demokratike nuk do t’ia lejojë vetes një njollë të tillë.
Ne duhet të jemi bashkë dhe të mos ndalemi derisa shokët tanë të kthehen të lirë në shtëpi. Do të festojmë bashkë kthimin triumfal të tyre, sepse pa ta as festat nuk e kanë shkëlqimin e duhur.
Urime Kosovë, Dita e Pavarësisë!
