Kryeministri në detyrë i Kosovës, Albin Kurti, ka njoftuar rritjen e shtesave mujore për lehonat nga 170 në 325.9 euro, duke e cilësuar këtë si një arritje të qeverisjes së tij. Megjithatë, kjo masë nuk është pritur me entuziazëm nga qytetarët, të cilët kanë shpërthyer në komente kritike në rrjetet sociale.
Shumë prej tyre e kanë konsideruar njoftimin si një veprim të motivuar politikisht, për shkak të afrimit të zgjedhjeve lokale. Të tjerë theksuan se ndihma financiare është e pamjaftueshme përballë rritjes së çmimeve të energjisë dhe produkteve bazë.
“Çmimet janë në qiell, kjo shtesë nuk e mbulon dot as jetesën bazë,” shkruan një komentues, ndërsa një tjetër shton: “Jo krejt Kosova është shtatzënë, shumë pak njerëz përfitojnë nga kjo rritje.”
Ndërkohë, Kurti dhe ministri në detyrë i Financave, Hekuran Murati, vazhdojnë të theksojnë angazhimin për mbështetje sociale, pavarësisht reagimeve të përziera nga publiku.
