Kryeministri në detyrë i Republikës së Kosovës, Albin Kurti, i shoqëruar nga ministrja në detyrë e Ekonomisë, Artane Rizvanolli sot gjatë ditës vizitoi për ngushëllime familjen Ahmedi, e cila humbi më të dashurin e tyre, Prof. Dr. Fikret Ahmedi.
Ai i shprehu ngushëllimet më të sinqerta familjarëve të të ndjerit, teksa bashkë evokuan për jetën dhe veprën e tij, si një nga personalitetet më të shquara të arsimit të lartë dhe të fushës së inxhinierisë, dhe ndër profesorët e parë të Fakultetit të Ndërtimtarisë dhe Arkitekturës në Universitetin e Prishtinës.
Në shenjë respekti, Familja Ahmedi i dhuruan kryeministrit Kurti dhe ministres Rizvanolli tri libra universitar të Prof. Dr. Fikret Ahmedi.
Gjatë karrierës së tij, Prof. Dr. Fikret Ahmeti ka botuar tekste universitare, ka drejtuar për vite Fakultetin e Ndërtimtarisë dhe Arkitekturës dhe laboratorin e Gjeomekanikës, si dhe ka kontribuar si ekspert në projekte të rëndësishme inxhinierike në vend. Për kontributin e tij të jashtëzakonshëm, Prof. Dr. Ahmedi është nderuar me mirënjohje nga Universiteti i Prishtinës dhe Oda e Inxhinierëve të Kosovës. Ai vdiq më 13 qershor 2025 në moshën 82-vjeçare.