Prokuroria Themelore në Ferizaj ka njoftuar se është ndaluar për 48 orë i dyshuari R.K. nga komuna e Skenderajt, pasi dyshohet se ka kërcënuar dëshmitarin bashkëpunues në rastin “Brezovica”.
Sipas informacioneve personi i arrestuar është biznesmeni Ramiz Kamberi nga Skenderaj, ndërsa i kërcënuari është A.Q.
Në njoftim thuhet se R.K. dyshohet për veprat penale “Frikësimi gjatë procedurës penale” dhe “Mbajtja në pronësi, kontroll ose posedim të paautorizuar të armëve”.
Prokuroria bën të ditur se më 21 mars 2026, në restaurantin “Mero” në fshatin Uglar të Komunës së Fushë Kosovës, i dyshuari ka kanosur seriozisht dëshmitarin, duke i thënë:
“Vetëm qenke me fëmijë, se pa të vra në këtë vend nuk e kisha lanë.”
Kërcënimi kishte për qëllim frikësimin e dëshmitarit bashkëpunues që të përmbahej nga dhënia e deklaratave në çështjen penale “Brezovica”, e cila është në shqyrtim gjyqësor në Gjykatën Themelore në Pejë.
Prokuroria thekson se R.K. ka qenë i pandehur edhe më parë në rastin “Brezovica”. Brenda afatit ligjor, ndaj të dyshuarit do të parashtrohet kërkesë për caktimin e masës së paraburgimit në Gjykatën Themelore në Pejë.